طلعوا بالمزة يوم الاربعاء 11 ايار 2011 حوالي الساعة 4 الضهر، كتار كتير، شي 25 واحد، لا اكتر بكتير بيوصلوا لل35، مشيو عالأوتستراد وطابعين كنزات, ياااا محمد شو حلوين هالكنزات! هيك بيضا وعليها صورة، وكانوا حاملين علم وعم يهتفوا بس ما قدرت شوف الصورة ولا قدرت اسمع شو عم يهتفوا، وانا عم اتفرج من الشباك خايفة انزل، ايه شو بينزلني لبين ما أوصل بكونوا تفرطعوا، ايه شو مجنونة انا ...
صار مارء ربع ساعة وهنن عم يتدرجوا هيك شوي شوي والسيارات عم تهدي جنبون وتتفرج بس ما حدا عم يقرب عليون ... شكلوا ما حدا مسترجي يا حرام ... لك بس الغريب انو صارلون ربع ساعة ولحد الآن وما شفت هراوات وخبط متل هدول اللي بشوفن بفيديوهات اليوتيوب المغرضة العما شو كزابين هدول جماعة اليوتيوب!
يا عمي لسا تاركين الدنيي كللا وماسكين سوريا.. لك يا الله شو عملتلون سوريا ! ما علينا مو هي سيرتنا...
المهم يا سيدي ما عاد حملني عقلي الصراحة بدي انزل ... وصلت لاقيتون قاعدين عالرصيف مئابيل الآداب ومشوبين و العلم شكلو تعبان، ياي ما أحلا هالكنزة بس مين هدا اللي بالصورة لك العما !!!! هدا هو ... بجلالة قدرو .... أكيد عرفتوه يعني ما في داعي نحكي ... شو كم دكتور عنا بالبلد ...
ايواااااااا هلق عرفت ليه ما حدا قرب عليون ولا هراوات ولا مدري شو ... بس لهلق ما عرفت، يا ترى ليه ما حدا انضملون ؟؟؟ معقول يكونوا طلاب الآداب مندسين ... لا ما معقول ...
لك الساعة 4 الضهر.... كل شي معقول
ليست هناك تعليقات:
إرسال تعليق